'Wolst tips en trúks om sa foar te dragen dat it publyk dy de wurden wol út 'e mûle helje wol? It geheim achter it goed brûken fan stiltes yn dyn foardracht? Ljouwert City of Literature en Tryater jouwe fan tongersdei 23 septimber ôf in workshoprige fan fiif jûnen foardrachtskeunst foar profesjonele skriuwers en dichters. De oanmelding is no iepen!

Yn dizze workshoprige ûndersikest op boartlike wize de mooglikheden om in tekst oer te bringen. Silst mei akteur en teaterdosint Karel Hermans oan 'e gong mei dyn eigen teksten, poëzy of proaza, yn hokker taal ast mar wolst. Yn fjouwer gearkomsten fynst út wêr’t dyn kwaliteiten lizze en wêr’tst oan wurkje kinst. It giet benammen om wille en ferbyldingskrêft. We wurkje mei dy oan hâlding, it brûken fan stim, ynterpretaasje en teatertechnyk. Dit is it ark foar in goeie foardrachtskeunstner. Nei fjouwer gearkomsten jouwe we op 14 oktober mei ús allen in performance foar publyk.

Profesjonele skriuwers en dichters kinne harren foar 18 juny fergees oanmelde. Jou dy op! 
Meidwaan is fergees. We meitsje in seleksje út de oanmeldingen en litte yn de wike fan 21 juny witte ofst meidwaan kinst.

Bist selektearre, dan wurdst by alle gearkomsten ferwachte: de workshopjûnen op 23 septimber, 30 septimber, 7 oktober en 13 oktober fan 19:30 oant 22:00 oere en de presintaasje op 14 oktober fan 19:00 oant 20:00 oere. Lokaasje: Tryater, Oostersingel 70, Ljouwert.

Wolst mear ynformaasje? Sjoch by Ljouwert City of Literature.

(Foto Ruben van Vliet)